मुंबईत शिकवणीवर्ग घेणार्‍या ३ भावांकडून १५ वर्षांच्या मुलीवर लैंगिक अत्याचार !

२ भावांना अटक, मोठा भाऊ फरार

मुंबई – दक्षिण मुंबईत शिकवणीवर्ग चालवणार्‍या ३ भावांकडून १५ वर्षांच्या मुलीवर लैंगिक अत्याचार करण्यात आला आहे. २ भावांना पोलिसांनी अटक केली आहे, तर मोठा भाऊ अद्याप फरार आहे. समुपदेशनाच्या वेळी मुलीने उलगडा केला आहे. बाल विकास केंद्राच्या अधिकार्‍यांकडून पोलिसात गुन्हा नोंदवण्यात आला आहे.

तिन्ही भावांचे वय अनुक्रमे २४, २५ आणि २७ असे आहे. वर्ष २०२२ पासून शिकवणीवर्गात मुलीवर अत्याचार केला जात होता. अपकीर्तीच्या भीतीपोटी मुलगी घरी आईला काही सांगत नव्हती.

पीडित मुलीच्या आईचा घटस्फोट झाला होता. नियमित अत्याचारामुळे मुलगी धक्क्यात गेली होती. ती कुणाशी बोलत नव्हती. तिच्या आईने मुलीला बाल विकास केंद्रामध्ये पाठवले होते. मुलीला विश्वासात घेतल्यानंतर तिने याविषयी सांगितले. मुलीची आई आणि मुलगी तक्रार प्रविष्ट करण्यास घाबरत होते. त्यामुळे बालविकास केंद्राकडूनच तक्रार प्रविष्ट करण्यात आली. शिकवणीवर्गातील अन्य मुलींवरही अशा प्रकारे अत्याचार होत आहे का ? याची चौकशी करण्यात येत आहे.