(म्हणे) ‘मणीपूरसारखी स्थिती महाराष्ट्रातही होईल का ?’ – शरद पवार

मुंबई – मणीपूरमध्ये सामाजिक अशांतता असल्याने पंतप्रधानांना तिकडे चक्कर टाकावी, तेथील लोकांना दिलासा द्यावा, असे कधी वाटले नाही. आजूबाजूच्या राज्यांतही हे घडले. खाली कर्नाटकातही घडले. अलीकडच्या काळातही महाराष्ट्रातही असे काही घडेल कि काय ?, असे वक्तव्य शरद पवार यांनी केले. नवी मुंबईतील वाशी येथे आयोजित ‘सामाजिक एकता परिषदे’च्या कार्यक्रमात ते बोलत होते.

१. पवार म्हणाले की, मणीपूरमधील विविध जाती, धर्म आणि भाषा बोलणारे लोक आम्हाला भेटायला देहलीत आले. हे चित्र काय सांगते ? पिढ्यान्‌पिढ्या एकसंध असलेला प्रांत अशांत झाला, घरे पेटवली गेली. एकत्र राहून सौहार्द जपणारे मणीपुरी नागरिक आज एकमेकांशी बोलायला सिद्ध नाहीत. आज एवढे मोठे संकट राज्यावर आले असतांना त्याची काळजी घेण्याचे दायित्व शासनकर्त्यांचे आहे; पण दुर्दैवाने आजच्या शासनकर्त्यांनी याकडे ढुंकूनही पाहिले नाही.

२. पवार यांच्या वरील वक्तव्याविषयी माध्यमांनी मनसेचे अध्यक्ष राज ठाकरे यांना त्यांचे मत विचारले असता ते म्हणाले, ‘‘पवारांनी याला (दंगलींना) हातभार लावू नये.’’ भाजपचे नेते चंद्रशेखर बावनकुळे या संदर्भात म्हणाले, ‘‘त्यांच्या तोंडून दंगल घडवण्याची भाषा योग्य नाही. महाराष्ट्राची जनता सूज्ञ आहे. राज्यात तशी स्थिती नव्हती आणि नाही. काही लोक समाजात तेढ निर्माण करतात. तशी आंदोलने करतात आणि राज्यातील जनतेला विचलित करण्याचे काम करतात.’’