अकरावीच्या कोट्यांतर्गत प्रवेशातील अर्ध्यांहून अधिक जागा रिकाम्या !

गुणवत्तेवर आधारित प्रवेश होण्यासाठी मागणी !

पुणे – अकरावीसाठी राबवण्यात येणार्‍या ‘ऑनलाईन’ प्रवेशामध्ये व्यवस्थापन, अल्पसंख्यांक, ‘इनहाऊस’ अशा विविध कोट्यांतर्गत प्रवेश प्रक्रिया शून्य ते शेवटच्या फेरीपर्यंत संधी दिली जाते; परंतु कोट्यांतर्गत प्रवेशामध्ये अर्ध्याहून अधिक जागा रिकाम्या रहात आहेत; म्हणूनच आता विद्यार्थ्यांचे प्रवेश हे गुणवत्तेवर आधारितच व्हावे आणि विविध प्रकारच्या कोट्यांतर्गत प्रवेश नियमित प्रवेश फेर्‍यांपूर्वीच राबवण्यात यावेत, अशी मागणी होत आहे.

व्यवस्था सुधारणा मोहीम (सिस्कॉम) यांच्याकडून शैक्षणिक वर्ष २०२३-२४ या कालावधीत राबवलेल्या ११ वीच्या केंद्रीय ऑनलाईन प्रवेश प्रक्रियेतील विविध कोट्यांतर्गत प्रवेशाचा तपशिल माहिती अधिकारामध्ये मागवण्यात आला होता. त्यात विविध कोट्यांतर्गत १०० टक्के जागा भरल्या जात नाहीत, असे लक्षात आले आहे.