डोंबिवलीजवळील पलावा वसाहतीत निर्माणाधीन इमारतीला भीषण आग

डोंबिवली, १४ जानेवारी (वार्ता.) – डोंबिवलीजवळील पलावा वसाहतीमधील पलावा टप्पा क्र.२ येथील टाटा ओरोलिया या निर्माणाधीन असलेल्या १९ मजली इमारतीला १३ जानेवारीला दुपारी अचानक आग लागली.

इमारतीचे यांत्रिक सामान असलेल्या तळगृहात (डक्ट) अचानक ही आग लागली. पलावा वसाहतीमधील २ अग्नीशमन वाहने तातडीने घटनास्थळी आली. त्यांनी आगीवर पाण्याचे फवारे मारून आग विझवली. ही वाहने इमारतीच्या ७ व्या ते ८ व्या माळ्यापर्यंतची आग विझवू शकली. त्यानंतर पर्यायी यंत्रणेचा वापर करून जवानांनी इमारतीच्या वरच्या भागापर्यंत गेलेली आग विझवली. आग लागल्यानंतर खोणी पलावा वसाहतीमधील रहिवाशांमध्ये भीतीचे वातावरण पसरले होते. या प्रकरणी पुढील अन्वेषण चालू आहे.