संगमेश्वर तालुक्यातील अल्पवयीन मुलीवर अत्याचार करणारा आरोपी पोलिसांच्या कह्यात

रत्नागिरी – जिल्ह्यातील संगमेश्वर तालुक्यातील एका अल्पवयीन मुलीवर दोघांनी कट करून लैंगिक अत्याचार केला होता. या प्रकरणातील आरोपी सुमीत संजय लोथ याला संगमेश्वर पोलिसांनी तत्परतेने अटक केली होती; मात्र दुसरा आरोपी पसार झाला होता. जानेवारी २०२३ मध्ये हा गुन्हा घडल्यापासून पसार असलेला प्रेम शिंदे (संगमेश्वर) या आरोपीला ९ मासांनंतर कल्याण गुन्हे शाखेच्या पथकाने डोंबिवली जवळील उंबार्ली गावात अटक केली. या लैंगिक अत्याचार प्रकरणी बाल लैंगिक अत्याचार कायद्याने संगमेश्वर पोलीस ठाण्यात गुन्हा नोंद करण्यात आला होता.

संगमेश्वर तालुक्यात लैंगिक अत्याचार करून पळालेला आरोपी उंबार्ली गावातील एका चाळीत रहात असल्याची माहिती कल्याण गुन्हे अन्वेषण शाखेतील हवालदार सचीन वानखेडे यांना मिळाली. त्यानंतर आरोपीला पोलिसांनी सापळा लावून पकडून त्याला संगमेश्वर पोलिसांच्या कह्यात देण्यात आले. या प्रकरणाचे पुढील अन्वेषण संगमेश्वर पोलीस करत आहेत.