१ जुलैला मुंबईत १८९ जणांचा राज्यस्तरीय कृषी पुरस्कारांनी गौरव होणार !

कृषीमंत्री दत्तात्रय भरणे यांची माहिती

मुंबई – राज्यातील कृषी क्षेत्रात उत्कृष्ट कार्य करणारे शेतकरी, महिला शेतकरी, संस्था आणि कृषी अधिकारी-कर्मचारी यांच्या गौरवासाठी महाराष्ट्र शासनाने २०२३ अन् २०२४ चे राज्यस्तरीय कृषी पुरस्कार घोषित केले आहेत. माजी मुख्यमंत्री स्व. वसंतराव नाईक यांच्या जयंतीनिमित्त साजर्‍या होणार्‍या कृषीदिनाचे औचित्य साधून १ जुलैला मुंबईत राज्यपाल जिष्णु देव वर्मा यांच्या हस्ते पुरस्कारांचे वितरण होईल, अशी माहिती कृषीमंत्री दत्तात्रय भरणे यांनी दिली.

या सोहळ्याला प्रमुख अतिथी म्हणून मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि उपमुख्यमंत्री सुनेत्रा पवार उपस्थित रहातील. कृषीक्षेत्रात आधुनिक तंत्रज्ञान, सेंद्रिय शेती, फलोत्पादन आणि उत्पादनवाढीत उल्लेखनीय योगदान देणार्‍या एकूण १८९ पुरस्कारार्थींचा या वेळी सत्कार केला जाईल.