महाराणी येसूबाई यांच्या समाधीचा विकास करणार ! – छत्रपती उदयनराजे भोसले

सातारा, १२ एप्रिल (वार्ता.) – महाराणी येसूबाई यांच्या समाधीचा सर्वार्थाने विकास केला जाईल. यासाठी मुख्यमंत्री, उपमुख्यमंत्री यांच्याकडे पाठपुरावा करण्याच्या समवेत पुरातत्व विभाग आणि संबंधित अधिकारी यांसोबत लवकरच बैठक घेण्यात येईल, अशी माहिती भाजपचे खासदार श्रीमंत छत्रपती उदयनराजे भोसले यांनी दिली.

१० एप्रिल या दिवशी संगम माहुली येथील महाराणी येसूबाई यांच्या समाधीचे दर्शन खासदार श्रीमंत छत्रपती उदयनराजे भोसले यांनी घेतले. यानंतर ते प्रसिद्धीमाध्यमांशी बोलत होते. खासदार भोसले म्हणाले की, छत्रपती शिवाजी महाराज, छत्रपती संभाजी महाराज या युगपुरुषांचे योगदान अमूल्य आहे. आम्ही त्यांच्या घराण्यातील असलो, तरी महाराज कोणत्या एका घराण्यापुरते मर्यादित नव्हते. ते सर्वांचे होते. महाराणी येसूबाई यांच्या समाधीस्थळाचा विकास करणे, हे आमच्यासह शासनाचेही उत्तरदायित्व आहे. आपल्या पूर्वजांचा गौरवशाली इतिहास आपण विसरता कामा नये. यासाठी इतिहासाचे जतन व्हायला हवे.