उमरखेड (जिल्हा यवतमाळ) येथे शेख ऐफाज याच्याकडून आधुनिक वैद्यांची हत्या

उमरखेड (जिल्हा यवतमाळ) – येथील उपजिल्हा रुग्णालयातील आधुनिक वैद्य हनुमंत धर्मकारे यांची ११ जानेवारी या दिवशी शेख ऐफाज शेख अब्रार (वय २२ वर्षे) याने गोळ्या झाडून हत्या केल्याचे उघड झाले. भावाच्या मृत्यूस हे आधुनिक वैद्यच उत्तरदायी आहेत, असे समजून मृत भावाचे कपडे घालून ऐफाज याने ही हत्या केली.

पोलिसांनी ४८ घंट्यांच्या आत गुन्हा उघडकीस आणून ऐफाज याने सय्यद तौसिफ (वय ३५ वर्षे), सय्यद मुस्ताक (वय ३२ वर्षे), शेख मोहसीन शेख कय्यूम (वय ३४ वर्षे), शेख शाहरूख शेख आरम (वय २७ वर्षे) यांच्या साहाय्याने त्याने हत्या केल्याचे उघड केले. मुख्य आरोपी शेख ऐफाज हा घटना घडल्यापासून पसार होता. त्याला मध्यप्रदेशातील धार येथून कह्यात घेण्यात आले. २ वर्षांपूर्वी त्याच्या भावाचा येथील चौकात अपघात झाला होता. त्या वेळी रुग्णालयात उपचारासाठी भरती केले असता त्याचा मृत्यू झाला. या मृत्यूस आधुनिक वैद्य धर्मकारे कारणीभूत असल्याचा ऐफाज याचा आरोप होता. त्यामुळे त्याने धर्मकारे यांची हत्या केली, असे त्याने सांगितले.