इन्स्टाग्रामवरील बनावट खात्याद्वारे मुलींशी मैत्री करून त्यांची अश्लील छायाचित्रे काढणारा धर्मांध अटकेत !

वसई – इन्स्टाग्रामवर हिंदु मुलीच्या नावे खाते सिद्ध करून त्याद्वारे मुलींशी मैत्री करून त्यांची अश्लील छायाचित्रे काढणार्‍या अबू सलीम अन्सारी याला पोलिसांनी अटक केली आहे.

या प्रकरणी पीडित तरुणीने पोलीस ठाण्यात तक्रार केली होती. त्यानुसार पोलिसांनी अन्वेषण करून त्याला अटक केली. या अन्वेषणात पुढील धक्कादायक गोष्ट उघड झाली.

अन्सारी याने इन्स्टाग्रामवर सारा वर्मा असे हिंदु मुलीच्या नावे बनावट खाते सिद्ध केले होते. त्यात त्याने स्वतःच्या ओळखीमध्ये (प्रोफाईलमध्ये) तो ‘फॅशन मॉडेल’ असल्याचे म्हटले होते. या माध्यमातून तो मुलींशी मैत्री करत होता. नंतर काही दिवसांनी तो मुलींना एका प्रसिद्ध आस्थापनाच्या विज्ञापनामध्ये काम देण्याचे प्रलोभन दाखवत होता. त्यानंतर त्यांना व्हॉट्सॲपवर ‘व्हिडिओ कॉल’ करून त्यांची अश्लील छायाचित्रे काढत होता. ही छायाचित्रे तो इन्स्टाग्रामवर टाकण्याची (अपलोड करण्याची) धमकी देत मुलींकडून पैशांची, तसेच शरीरसुखाची मागणी करत असल्याचे उघड झाले आहे.

आरोपीने अशा प्रकारे ८ मुलींना फसवले आहे; मात्र फसवलेल्या मुली समोर येत नाहीत. त्यामुळे पोलिसांनी फसवणूक झालेल्या मुलींना तक्रार करण्याचे आवाहन केले आहे.