चिखली (जिल्हा बुलढाणा) येथील अनुराधा नागरी सहकारी बँकेत अपहार करणार्‍यांवर फौजदारी गुन्हा नोंद करण्याची मागणी

विरोधकांचा गदारोळ

मुंबई, १० मार्च (वार्ता.) – बुलढाणा जिल्ह्यातील चिखली गावातील अनुराधा नागरी सहकारी बँकेमध्ये वर्ष २००६-०८ या कालावधीत राज्य आणि केंद्र शासनांकडून कर्ज वाटपासाठी एकूण ३ कोटी २४ लाख रुपयांचा निधी वितरीत केला होता; मात्र या बँकेने खोटी कर्ज खाती दाखवून २ कोटी ३७ लाख रुपयांचा अपहार केला आहे. चौकशी समितीनेही तसाच खोटा अहवाल सिद्ध केला आहे. त्यामुळे या प्रकरणातील दोषींवर फौजदारी कारवाई करून २ कोटी ३७ लाख रुपयांची रक्कम वसूल करावी, अशी मागणी विरोधी पक्षनेते देवेंद्र फडणवीस यांनी १० मार्च या दिवशी विधानसभेत केली.

Dev_Fadnavis: 8 लाखाच्या ऐवजी अडीच कोटी रुपये वसूल करणाऱ्या बँकेवर कारवाई का होत नाही?
शेतकऱ्यांची लूट करणाऱ्यांना राज्य सरकारचे अभय का?#BudgetSession pic.twitter.com/uOjkz7mEzV

— Devendra Fadnavis Fan (@Dev_Fadanvis) March 10, 2021

या वेळी सहकारमंत्री बाळासाहेब पाटील यांनी सदस्यांनी विचारलेल्या प्रश्नाचे समाधानकारक उत्तर न दिल्याने विरोधकांनी सभागृहात गदारोळ घातला. भाजपच्या आमदार श्रीमती श्वेता महाले यांनी प्रश्नोत्तराच्या घंट्यांत हा प्रश्न विचारला होता.