शिवसेना आगामी गोवा विधानसभेची निवडणूक २५ ते ३० जागांवर लढवणार ! – शिवसेनेचे खासदार संजय राऊत

पणजी, ९ मार्च (वार्ता.) – गोव्यात आगामी विधानसभेच्या निवडणुकीत शिवसेना २५ ते ३० जागांवर निवडणूक लढवणार आहे. राज्यात शिवसेनेचा प्रभाव असलेल्या ठिकाणी निवडणूक लढवली जाणार आहे, अशी माहिती शिवसेनेचे नेते संजय राऊत यांनी नुकतीच येथे एका पत्रकार परिषदेत दिली.

संजय राऊत पुढे म्हणाले, ‘‘गोव्यात भाजप शासनाच्या विरोधात नागरिकांमध्ये मोठ्या प्रमाणावर रोष आहे, तसेच विरोधी पक्ष त्यांचे काम व्यवस्थित करत नाहीत. यामुळे केवळ निवडणुकीच्या वेळी काम करणार्‍या ‘आप’सारख्या पक्षाला गोव्यात प्रवेश करण्यास संधी मिळत आहे. गत निवडणुकीत शिवसेनेने समविचारी पक्षांसमवेत युती करून एकूण ३ जागांवर निवडणूक लढवली होती.’’