वैभववाडी येथे ६ गोवंशियांची अवैध वाहतूक रोखली

वैभववाडी – खारेपाटण येथून संकेश्वर (बेळगाव) येथे अवैधरित्या ६ गोवंशियांची वाहतूक करत असल्याच्या प्रकरणी टेंपोचा चालक विवेक शामराव कांबळे (रहाणार निपाणी) आणि त्याचा साहाय्यक रूपेश लहू जाधव (रहाणार राजापूर) या २ जणांच्या विरोधात पोलिसांनी गुन्हा नोंद केला आहे. ही कारवाई १० जुलै या दिवशी सकाळी करण्यात आली.

स्थानिक पोलिसांचे पथक भुईबावडा परिसरात गस्त घालत असतांना खारेपाटण-गगनबावडा मार्गावरील हेत फाटा येथे वाहनांची तपासणी करत होते. त्या वेळी खारेपाटणहून गगनबावडाच्या दिशेने जाणार्‍या टेंपोचा संशय आल्याने त्याला थांबवून तपासणी केली. त्या वेळी टेंपोमध्ये ४ गायी आणि २ वासरे, असे एकूण ६ गोवंश अत्यंत  दाटीवाटीने भरल्याचे दिसले. याविषयी विचारल्यावर विवेक कांबळे आणि रूपेश जाधव यांनी ‘ही गुरे खारेपाटण येथील इम्रान लतीफ खान यांच्याकडून घेऊन संकेश्वर (बेळगाव) येथे नेत आहोत’, असे सांगितले. त्यानंतर पोलिसांनी टेंपोसह गोवंश कह्यात घेऊन वैभववाडी पोलीस ठाण्यात आणला आणि नंतर गोवंशियांना कुसूर येथील गोशाळेत पाठवण्यात आले.