शनिशिंगणापूर देवस्थान गर्दीवर नियंत्रणासाठी वास्तूविशारद नेमणार

सिंहस्थ कुंभपर्वाच्या पार्श्वभूमीवर दर्शनव्यवस्था सुरळीत करण्यासाठी उपाययोजना !

नेवासा (जिल्हा अहिल्यानगर) – नाशिक येथे होत असलेल्या सिंहस्थ कुंभपर्वाच्या पार्श्वभूमीवर तीर्थक्षेत्र शनिशिंगणापूर येथे गर्दीवर नियंत्रण मिळवण्यासाठी आणि दर्शनव्यवस्था सुरळीत रहाण्याच्या दृष्टीकोनातून उपाययोजनेच्या कामासाठी शनिशिंगणापूर देवस्थान आता वास्तूविशारद नेमणार आहे. यासाठी शिर्डी संस्थानचेही साहाय्य घेणार आहे. सिंहस्थ कुंभपर्व सोहळा हा साधारण १८ महिने चालणार असल्याचे यापूर्वी घोषित केले आहे. त्यामुळे शनिशिंगणापूर येथे शनिदर्शनासाठी प्रतिदिन किमान ३ ते ४ लाख भाविक येतील, असा अंदाज व्यक्त करण्यात येत आहे.

भाविकांसाठी मुख्य असलेल्या दर्शन बारी, एक दर्शनरांग, भाविकांना थांबण्यासाठी तंबू उभारणी, वाहनतळ काँक्रिटीकरण, भक्तनिवास नूतनीकरण यांसह विविध कामे करण्यासाठी शनी देवस्थान वास्तूविशारद नेमणार आहे. सध्या शनिशिंगणापूर देवस्थानावर नाशिक आयुक्त डॉ. प्रवीण गेडाम हे प्रशासक आहेत. देवस्थानकडून विकासकामांसाठी २० ते २५ कोटी रुपयांचा आराखडा प्राथमिक स्वरूपात सिद्ध करण्याचे काम चालू केले असून देवस्थान कार्यकारी अधिकारी अतुल चोरमारे यांनी प्राथमिक विकास आराखड्यास दुजोरा दिला आहे.