Driver Stops Train : मध्यप्रदेश – समोसा खाण्यासाठी रेल्वेच्या चालकाने रेल्वेगाडी थांबवली !

भोपाळ (मध्यप्रदेश) –  रेल्वेच्या चालकाने, म्हणजेच ‘लोको पायलट’ने चक्क समोसा खाण्यासाठी रेल्वे थांबवली. यासंदर्भातील व्हिडिओ सामाजिक माध्यमांत प्रसारित झाला आहे. या प्रकरणी सदर चालकाची चौकशी केली जाणार असून त्यानंतर कारवाई केली जाणार आहे.

या व्हिडिओत रेल्वे रुळावर उभी असल्याचे दिसत आहे. त्या वेळी ‘रेल्वेच्या चालकाने मध्येच रेल्वेगाडी थांबवून समोशाच्या दुकानात जाऊन सामोसे खरेदी केले. समोशांची पिशवी घेऊन तो पुन्हा रेल्वेत बसला. त्यानंतर थोड्या वेळाने रेल्वे चालू झाली’, असे व्हिडिओमध्ये दिसत आहे. हा व्हिडिओ पाहून अनेकांनी तीव्र प्रतिक्रिया व्यक्त केल्या आहेत. ‘रेल्वेच्या चालकाने कोणत्या अधिकाराखाली रेल्वे थांबवली ? त्याला रेल्वे थांबवण्याचा आदेश मिळाला होता का ? रेल्वे कुठे आणि किती वेळ थांबवायची ?, याचा नियम आहे. आदेश आल्याविना रेल्वे कुठेही मध्येच थांबवता येत नाही. असे असतांना चालकाने ती मध्येच कशी थांबवली ?’, असे प्रश्नही उपस्थित केले जात आहेत.