पुणे येथे पिण्याच्या पाण्याचा गैरवापर करणार्‍यास १० सहस्र रुपये दंड !

पुणे, २३ जून – भारतीय हवामान विभागाने यंदा अल्प पावसाचा अंदाज वर्तवला आहे. या पार्श्वभूमीवर पुणे महापालिकेने पिण्याच्या पाण्याचा गैरवापर (अपव्यय) रोखण्यासाठी विविध निर्बंध लागू केले आहेत. बांधकामासाठी पिण्याचे पाणी वापरणे, इमारतीवरील पिण्याच्या पाण्याची टाकी भरून पाणी वहाणे, तसेच महापालिकेच्या किंवा खासगी टँकरमधून पाणी गळती झाली, तर १० सहस्र रुपये दंड आकारला जाणार आहे. ‘वारंवार नियमभंग केल्यास गुन्हा नोंद केला जाणार’, अशी माहिती महापालिकेच्या अतिरिक्त आयुक्त पुनीत कौर यांनी दिली. सार्वजनिक आणि खासगी गाडी धुण्याची (‘वॉशिंग सेंटर’) ठिकाणे, सार्वजनिक आणि खासगी पोहण्याची ठिकाणे बंद ठेवण्याचे निर्देश देण्यात आले आहेत. उद्याने, पदपथ आणि अंगण स्वच्छतेसाठी पिण्याचे पाणी वापरण्यास मनाई करण्यात आली आहे. खासगी गृहनिर्माण संस्थांना सांडपाणी प्रक्रिया प्रकल्प (एस्.टी.पी.) कार्यान्वित करून त्या पाण्याचा पुनर्वापर बागकाम आणि शौचालय यांसाठी करणे, पाण्याच्या टाक्या भरून वाहू नयेत; म्हणून ‘ऑटोमॅटिक फ्लोट व्हॉल्व’ बसवणे बंधनकारक करण्यात आले आहे.