गुटखा तस्करांवर थेट ‘मकोका’: मुख्य सूत्रधारांचे नेटवर्क उद्ध्वस्त करणार !

मुंबई – महाराष्ट्रात प्रतिबंधित गुटखा, तंबाखू आणि पानमसाला यांची तस्करी करणार्‍या संघटित टोळ्यांवर थेट ‘मकोका’ अंतर्गत कारवाई केली जाणार आहे. अन्न आणि औषध प्रशासनाचे आयुक्त तुकाराम मुंढे यांनी हे आदेश दिले आहेत.

आतापर्यंत केवळ किरकोळ विक्रेत्यांवर कारवाई होत असल्याने मुख्य सूत्रधार मोकाट रहात होते; मात्र आता गुटखा उत्पादक, पुरवठादार, गुंतवणूकदार आणि गोदाम मालक अशा संपूर्ण साखळीचा छडा लावून हे नेटवर्क नष्ट केले जाईल. तुकाराम मुंढे यांनी पदभार स्वीकारताच अवघ्या १७ दिवसांत ३ कोटी २७ लाख रुपयांचा अवैध माल जप्त केला असून ३५ जणांवर गुन्हे नोंद केले आहेत. ‘प्रामाणिक व्यापार्‍यांना कोणताही त्रास होणार नाही’, असेही त्यांनी स्पष्ट केले आहे, तसेच मुंढे यांनी दूध भेसळ करणार्‍या दुग्ध चालकांनाही सक्त ताकीद दिली असून ग्राहकांना दर्जेदार आणि सुरक्षित दूध मिळणे बंधनकारक केले आहे.