पुणे शहरातील १०० वर्षांपूर्वीच्या वृक्षतोडीस विरोध ! – श्रीनाथ भिमाले, अध्यक्ष, स्थायी समिती

          पुणे – शहरातील विविध विकास प्रकल्पांसाठी महापालिकेकडून वृक्षतोड केली जाते. विकास कामे केली जात असतांना १०० वर्षांपूर्वीचे जुने वृक्ष तोडण्यास माझा विरोध आहे. स्थायी समितीच्या बैठकीमध्ये १५ क्षेत्रीय कार्यालयांना वृक्षारोपणासाठी १ कोटी ५० लाख रुपये निधीस मान्यता दिली आहे, असे मत महापालिकेतील स्थायी समितीचे अध्यक्ष श्रीनाथ भिमाले यांनी मांडले. (सर्वच वृक्षतोडीस विरोध हवा ! – संपादक)

शहरातील रस्ता रुंदीकरण, नदीकाठ सुधार प्रकल्प यांसह अन्य प्रकल्पांसाठी मोठ्या प्रमाणात वृक्षतोड केली जाते. त्या विरोधात पर्यावरणप्रेमी आणि नागरिक यांनी वेळोवेळी आंदोलने, विरोध दर्शवला आहे. महापालिकेने वृक्षतोड केल्यानंतर इतर ठिकाणी लावलेल्या वृक्षांचे ‘जी.पी.एस्. लोकेशन’ (प्रत्यक्ष लागवड केलेले ठिकाण) हे दक्षिण आफ्रिकेत दाखवले जात आहे.