अनधिकृत डोंगर कापणी केल्यास १ कोटी रुपयांपर्यंत दंड

पणजी, ५ जून (वार्ता.) – राज्यातील अनधिकृत डोंगर कापणीला आळा घालण्यासाठी नगर आणि शहर नियोजन मंडळाने कठोर दंडात्मक कारवाई करण्याचा निर्णय घेतला आहे. नगरनियोजन मंत्री विश्‍वजीत राणे म्हणाले, ‘‘नवीन प्रावधानांनुसार डोंगर कापणीसंबंधी पहिल्या उल्लंघनासाठी ५० लक्ष रुपये, त्यानंतर पुन्हा नियमभंग केल्यास ७५ लक्ष रुपये आणि तिसर्‍यांदा उल्लंघन करणार्‍यांना १ कोटी रुपये दंड भरावा लागणार आहे.

राज्यातील पर्यावरण आणि नैसर्गिक संपत्ती यांचे संरक्षण करण्यासाठी हा निर्णय घेण्यात आला आहे. गोव्यातील डोंगररांगा, जलस्रोत आणि पर्यावरणीय समतोल धोक्यात आणणार्‍यांच्या विरोधात सरकारची ‘शून्य सहनशीलता’ भूमिका रहाणार आहे.’’