काश्मीरमध्ये आतंकवाद्यांचा अड्डा बनलेल्या मदरशावर राष्ट्रीय अन्वेषण यंत्रणेची धाड !

श्रीनगर (जम्मू-काश्मीर) – राष्ट्रीय अन्वेषण यंत्रणेने २५ मे या दिवशी ‘जमात-ए-इस्लामी’शी संबंधित आतंकवादी अर्थसाहाय्य प्रकरणात जम्मू-काश्मीरमधील अनेक भागात धाडी टाकल्या. शोपियाँ आणि श्रीनगर येथील ३ ठिकाणांवर केलेल्या या कारवाईच्या वेळी आतंकवादी अर्थसाहाय्याशी संबंधित कागदपत्रे आणि डिजिटल उपकरणे जप्त करण्यात आली. शोपियाँमधील ‘आतंकवाद्यांचा अड्डा’ बनलेल्या ‘दारुल-उलूम-सिराजुल-उलूम’ या मदरशावर धाड टाकण्यात आली. ‘जमात-ए-इस्लामी’चा प्रमुख शहजादा औरंगजेब याच्या घरावरही अधिकार्‍यांनी धाड घातली. तसेच श्रीनगरमधील ‘जमियत-उल-बनात’ या मुलींच्या मदरशावरही धाड टाकण्यात आली.

राष्ट्रीय अन्वेषण यंत्रणेच्या अधिकार्‍यांनी दिलेल्या माहितीनुसार ‘जमात-ए-इस्लामी’वर आतंकवादाला खतपाणी घालणे, फुटीरतावादी विचारधारेचे समर्थन करणे आणि जम्मू-काश्मीरमध्ये राष्ट्रविरोधी कारवायांना प्रोत्साहन देणे इत्यादी आरोप आहेत.