Rajkot Demolition : राजकोट (गुजरात) येथे पालिकेने रातोरात १२ मंदिरे पाडली !

राजकोट (गुजरात) – येथे १४ मेच्या मध्यरात्री पालिकेने अनधिकृत असल्याचे सांगत एकाच वेळी १२ मंदिरे बुलडोझरद्वारे पाडली. यांपैकी ७ मंदिरे हनुमंताची आहेत. या विरोधात मोठ्या संख्येने हिंदूंनी रस्त्यावर उतरून निषेध केला. राजकोट महानगरपालिकेने स्थानिक लोकांशी संघर्ष टाळण्यासाठी रस्त्यांवरील लहान मंदिरे पाडण्याचे काम रात्री दीड वाजता चालू केले होते. अतिक्रमण हटवण्याची कारवाई पहाटे ५ वाजेपर्यंत चालू होती. यासाठी अधिकार्‍यांनी अग्नीशमन दल, दक्षता विभाग आणि स्थानिक पोलीस यांच्या साहाय्याने ही कारवाई केली. स्थानिक लोकांनी यावरून पालिकेत सत्तेत असणार्‍या भाजपवर कठोर शब्दांत टीका केली.

मालवीय नगर पोलीस ठाण्याजवळच्या एका हनुमान मंदिरालाही पाडण्याची नोटीस बजावण्यात आली होती; मात्र याची माहिती मिळताच स्थानिक लोक आणि तरुण मोठ्या संख्येने मंदिराबाहेर जमा झाले. मंदिराबाहेर सलग ४ घंटे धरणे दिल्यानंतर विभागाच्या अधिकार्‍यांनी स्थानिक लोकांना आश्‍वासन दिले की, ते मंदिर परिसराचा रस्त्यावर येणारा एक छोटासा भागच पाडतील.