पोलीस घटनास्थळी पोचल्यावर ‘धिरयो’च्या आयोजकांचे पलायन

(‘धिरयो’ म्हणजे बैल किंवा रेडे यांची झुंज)

मडगाव, १० मे (वार्ता.) – सासष्टी तालुक्यात एका ठिकाणी ‘धिरयो’चे आयोजन करण्यात आले होते; मात्र ‘धिरयो’ होण्यापूर्वीच पोलीस घटनास्थळी पोेचल्याने ‘धिरयो’च्या आयोजकांनी घटनास्थळावरून पलायन केले. सूत्रांनी दिलेल्या माहितीनुसार ‘कार्मोणा’ आणि ‘झालोर’ या नावाच्या २ बैलांमध्ये झुंज होणार होती आणि यासाठी आयोजक आणि प्रेक्षकवर्ग मोठ्या संख्येने घटनास्थळी जमले होते. ‘धिरयो’ होण्यापूर्वीच पोलीस घटनास्थळी पोचल्याने ‘धिरयो’ रहित करण्यात आला. पोलीस घटनेचे पुढील अन्वेषण करत आहेत. प्राण्यांवरील क्रूरतेवरून ‘धिरयो’च्या आयोजनावर सर्वोच्च न्यायालयाने बंदी घातली आहे. सध्या प्रशासन न्यायालयाच्या आदेशाचे कठोरतेने पालन करण्यासाठी प्रयत्नशील आहे; मात्र सासष्टी तालुक्यात ठिकठिकाणी ‘धिरयो’चे आयोजन केले जात असल्याच्या घटना समोर येत आहेत.