सातारा येथे श्रीमंत वृषालीराजे भोसले यांच्या नेतृत्वात निषेध मोर्चा !

सातारा, २५ एप्रिल (वार्ता.) – ‘राष्ट्रीय शैक्षणिक संशोधन आणि प्रशिक्षण परिषदे’कडून (एन्.सी.ई.आर्.टी.कडून) मराठा साम्राज्याचा नकाशा ८ वीच्या अभ्यासक्रमातून वगळण्यात आला आहे. याचा निषेध व्यक्त करण्यासाठी येथे श्रीमंत वृषालीराजे भोसले यांच्या नेतृत्वात मोर्चा काढण्यात आला. या वेळी एन्.सी.ई.आर्.टी.चा तीव्र शब्दांत निषेध व्यक्त करत जिल्हाधिकार्‍यांना निवेदन देण्यात आले. (असे निवेदन का द्यावे लागते ? प्रशासन स्वत:हून कृती केव्हा करणार ? – संपादक)

या वेळी श्रीमंत वृषालीराजे भोसले म्हणाल्या, ‘‘मराठा साम्राज्याचा नकाशा पूर्ववत् न केल्यास संपूर्ण महाराष्ट्रभर आंदोलन करण्यात येईल. छत्रपती घराण्याच्या वतीने न्यायालयात जनहित याचिका प्रविष्ट करण्यात येणार असून केंद्र सरकारला १५ दिवसांची समयमर्यादा देत आहोत. हा केवळ अभ्यासक्रमाच्या विषय नसून महाराष्ट्राच्या अस्मितेचा विषय आहे. छत्रपती शिवाजी महाराज यांच्या विचारांवर घाला घालण्याचा प्रकार केंद्र सरकारने थांबवावा.’’