पुणे येथे २ लाख रुपयांची लाच स्वीकारतांना २ भूवैज्ञानिकांना अटक !

पुणे – भूजल सर्वेक्षण विभागाचा अहवाल देण्यासाठी २ लाख रुपयांची लाच घेणारे वरिष्ठ भूवैज्ञानिक दिवाकर नामदेव धोटे आणि कनिष्ठ भूवैज्ञानिक प्रियंका संदीपान घुले यांच्या विरोधात भ्रष्टाचार प्रतिबंधक कायद्यान्वये शिवाजीनगर पोलीस ठाण्यात गुन्हा नोंद करण्यात आला. या प्रकरणी एका बांधकाम व्यावसायिकाने लाचलुचपत प्रतिबंधक विभागाकडे तक्रार प्रविष्ट केली होती.

तक्रारदाराने ‘पुणे महानगर प्रादेशिक क्षेत्र विकास प्राधिकरणा’कडे (‘पी.एम्.आर्.डी.ए.’कडे) बांधकाम पूर्णत्वाचा दाखला मिळण्यासाठी अर्ज केला होता. त्यासाठी भूजल सर्वेक्षण विभागाचा अहवाल आवश्यक होता. हा अहवाल देण्यासाठी प्रथम अडीच लाख रुपयांची लाच मागितली होती. तडजोडीनंतर २ लाख रुपये देण्याचे मान्य केले. ही लाच स्वीकारतांना लाचलुचपत प्रतिबंधक विभागाने कारवाई केली.