अहिल्यानगरचे माजी महापौर अभिषेक कळमकर यांच्या विरोधात मालमत्ता जप्तीची कारवाई होणार !

अहिल्यानगर – महिला अत्याचाराच्या प्रकरणातील राष्ट्रवादी शरद पवार गटाचे माजी महापौर अभिषेक कळमकर यांना न्यायालयाने ‘स्टँडिंग वॉरंट’ (कायमस्वरूपी अटक आदेश म्हणजे जोपर्यंत आरोपीला अटक होत नाही तोपर्यंत तो सक्रीय असतो.) बजावले आहे. तरीही आरोपीचा शोध लागत नाही. आता कळमकर यांना थेट न्यायालयात उपस्थित होण्याचे आदेश दिले आहेत. न्यायालयात उपस्थित न झाल्यास ‘पसार’ म्हणून घोषित करण्यात येईल. त्यांच्या स्थायी मालमत्ता जप्तीची कारवाई करण्यात येईल, असा जाहीरनामा न्यायालयाने दिला असल्याचे पोलिसांनी दिलेल्या प्रसिद्धीपत्रकात म्हटले आहे.

१. कळमकर यांनी पुणे जिल्ह्यातील एका महिलेला नोकरीचे आमीष दाखवून तिच्याशी बळजोरीने शारीरिक संबंध निर्माण केले. या घटनेचे चित्रीकरण करून ते सामाजिक माध्यमांवर प्रसारित करण्याची, तिला आणि तिच्या मुलाला जिवे मारण्याची धमकी दिली.

२. या त्रासाला कंटाळून पीडित महिलेने एम्.आय.डी.सी. पोलीस ठाण्यात तक्रार प्रविष्ट केली.

३. गुन्हा नोंद झाल्यापासून अभिषेक कळमकर पसार झाले आहेत. त्यांचा शोध घेण्यासाठी महाराष्ट्रातील विविध भागांत पोलीस पथके पाठवून ते सापडले नाहीत.

४. कळमकर यांच्यावर आणखी एका तरुणीने गंभीर आरोप केले आहेत. त्यासंबंधीची तक्रार भिंगार कँप पोलीस ठाण्यात प्रविष्ट केली आहे.