Pune Hidma Madvi Sublimation : पुणे येथे डॉ. बाबासाहेब आंबेडकर जयंतीच्या कार्यक्रमात क्रूर नक्षलवादी हिडमा मडावी याचे उदात्तीकरण

पुणे – येथील समाजकल्याण वसतिगृहात डॉ. बाबासाहेब आंबेडकर जयंतीनिमित्त आयोजित सांस्कृतिक कार्यक्रमात शेकडो पोलिसांच्या हत्येचा सूत्रधार (मास्टरमाइंड) आणि कुख्यात नक्षलवादी हिडमा मडावी याच्यावर आधारित ‘जंगल का राजा हिडमा’ हे नाटक सादर करण्यात आले. या नाटकातून थेट आतंकवाद्याचे उदात्तीकरण करण्यात आल्याने पुण्यात ‘शहरी नक्षलवादा’ची पाळेमुळे किती खोलवर रुजली आहेत ?, हे लक्षात येते.

काय आहे हा राष्ट्रद्रोही प्रकार ?

या नाटकातील गाण्याचे शब्द अत्यंत प्रक्षोभक आणि भारतीय न्यायव्यवस्थेचा अपमान करणारे आहेत. ‘ओ बंदूकवाले हिडमा, वापस आजा मडावी हिडमा, क्रांती का वीर है तू हिडमा…’, असे म्हणत एका मारेकर्‍याला ‘क्रांतीवीर’ ठरवण्यात आले आहे. इतकेच नव्हे, तर ‘कोर्ट के चोरो ने घेरा डाला’, असे म्हणत न्यायदेवतेचा आणि ‘ग्रीन हंट बंदूक से हमको मारा’, असे म्हणत नक्षलवाद्यांविरुद्ध लढणार्‍या सुरक्षा दलांचा अवमान करण्यात आला आहे.