शिर्डी साई संस्थान कर्मचार्‍याच्या आत्महत्या प्रकरणी पुन्हा अन्वेषण करण्याचा न्यायालयाचा आदेश !

शिर्डी – साई संस्थानचे कर्मचारी विकास दिवटे यांच्या आत्महत्या प्रकरणी राहाता न्यायालयाने महत्त्वपूर्ण निर्णय दिला आहे. दोषारोपपत्रातून नाव वगळण्यात आलेला संशयित भोंदू अशोक खरात याची आता पुन्हा सखोल चौकशी होणार आहे. पुरावे अपुरे असल्याचे कारण देत पोलिसांनी खरातला वाचवण्याचा प्रयत्न केला होता; परंतु दिवटे यांचे भाऊ राजेंद्र दिवटे यांनी याला आक्षेप घेऊन पुन्हा या प्रकरणाचे अन्वेषण करण्याची मागणी केली होती. त्यानुसार न्यायालयाच्या आदेशामुळे शिर्डी पोलीस खरातच्या भूमिकेचे नव्याने अन्वेषण करणार आहेत.

विकास दिवटे यांनी जून २०२२ मध्ये सासरच्या मंडळींच्या जाचाला कंटाळून आत्महत्या केली होती. त्यांनी आत्महत्येपूर्वी लिहिलेल्या चिठ्ठीत सिन्नर येथील भोंदू अशोक खरात याचा स्पष्ट उल्लेख होता. सासरच्या मंडळींनी दिवटे यांना खरातकडे नेले होते, तिथे त्यांना धमकावून प्रचंड मानसिक त्रास देण्यात आला होता. पोलिसांनी खरातचे नाव आरोपपत्रातून वगळल्यामुळे दिवटे यांच्या कुटुंबियांनी आक्षेप घेतला होता.