श्री विठ्ठल रुक्मिणी मंदिरे समितीकडून डॉ. मुग्धा कर्णिक यांचा तीव्र निषेध !

पंढरपूर – ‘श्री विठ्ठल रुक्मिणी मंदिरे समिती’च्या वतीने पुणे येथे ‘साने गुरुजी स्मारका’त राष्ट्रीय सेवा दलाच्या माध्यमातून आयोजित ‘महाराष्ट्र नास्तिक मेळावा २०२६’ या कार्यक्रमातील डॉ. मुग्धा कर्णिक यांच्या वक्तव्यांचा तीव्र शब्दांत निषेध करण्यात आला आहे. या वक्तव्यांमुळे वारकरी संप्रदाय, संत परंपरा, तसेच श्री विठ्ठल भक्तांच्या धार्मिक भावना दुखावल्या गेल्याचे समितीने नमूद केले आहे. ‘श्री विठ्ठल रुक्मिणी मंदिरे समिती’चे सहअध्यक्ष ह.भ.प. गहिनीनाथ महाराज औसेकर यांनी सांगितले की, वारकरी संप्रदायाने शेकडो वर्षांपासून समाजात समता, प्रेम, शांतता आणि आध्यात्मिक एकात्मतेचा संदेश दिला आहे. संत ज्ञानेश्वर, संत तुकाराम, संत नामदेव, संत एकनाथ आदी संतांच्या शिकवणुकीमुळे समाजात सद्भावना आणि नैतिक मूल्ये यांची जपणूक झाली असून ही परंपरा महाराष्ट्राच्या सांस्कृतिक ओळखीचा अविभाज्य भाग आहे. ‘संबंधितांनी स्वत:च्या चुकीच्या वक्तव्याविषयी सार्वजनिकरित्या दिलगिरी व्यक्त करून वारकरी संप्रदायाविषयी आदराची भूमिका स्पष्ट करावी’, अशी अपेक्षा ‘श्री विठ्ठल रुक्मिणी मंदिरे समिती’ने व्यक्त केली आहे.

अभिव्यक्तीस्वातंत्र्याचा अधिकार असला, तरी त्याचा वापर करतांना समाजातील विविध धर्म, परंपरा अन् श्रद्धा यांचा आदर राखणे आवश्यक असल्याचे समितीने स्पष्ट केले. संत परंपरेविषयी अवमानास्पद विधाने समाजात तणाव निर्माण करू शकतात, असेही नमूद करण्यात आले. या निवेदनावर सदस्य श्री. रामचंद्र कदम, श्रीमती शंकुतला नंदगिरे, डॉ. दिनेशकुमार कदम, श्री. भास्करगिरी बाबा, श्री. संभाजी शिंदे, ह.भ.प. ज्ञानेश्वर देशमुख, अधिवक्त्या माधवी निंगडे, ह.भ.प. प्रकाश जवंजाळ, श्री. अतुलशास्त्री भगेगुरुजी, ह.भ.प. शिवाजी मोरे, तसेच पदसिद्ध सदस्या, सौ. प्रणिता भालके आदींची नावे नमूद केली आहेत.