विद्यार्थ्यांनी शिक्षण घेण्यासह नीतीमान आणि आदर्श व्यक्ती होण्याचा प्रयत्न करावा ! – पू. शिवाजी वटकर, सनातन संस्था

यशस्वी आणि आनंदी जीवन जगण्यासाठी काय करावे ? याविषयीचे मार्गदर्शन !

१. आपला जन्म पुण्यभूमी आणि वैभवशाली सनातन संस्कृती असलेल्या भारतात, संत-महात्मे आणि छत्रपती शिवाजी महाराज यांच्या महाराष्ट्रात झाला आहे. एवढेच नव्हे, तर आपला जन्म वैराग्याचे शिरोमणी संत गोरा कुंभार यांच्या तेर गावात झाला असून येथील महाराष्ट्र संत विद्यालयात आपण शिक्षण घेत आहोत. ‘आपण पुष्कळ भाग्यवान आहोत’, याची जाणीव ठेवून आचरण केले पाहिजे.

२. आपण इतिहासातून प्रेरणा घेऊन राष्ट्र आणि धर्म यांची सेवा केली पाहिजे. त्यासाठी संत आणि धर्म यांनी सांगितलेली साधना करणे आवश्यक आहे.

३. केवळ पैसा आणि प्रतिष्ठा मिळवण्यासाठी शिक्षण नसून सकारात्मक, स्थिर, यशस्वी आणि आनंदी जीवन जगण्यासाठी शिक्षण आहे.

४. शिक्षण घेतांना आपण प्रत्येक चांगल्या गोष्टीतून शिकले पाहिजे, उदा. आपली आई ही उत्कृष्ट ‘मॅनेजर’ (व्यवस्थापक) असते. आईकडे व्यवस्थापनाची कोणतीही पदवी नसते, तरीही ती घरकाम, मुलांचा सांभाळ, वेळेचे नियोजन इत्यादी सर्वकाही आनंदाने करत असते.

५. विद्यार्थ्यांनी आज्ञापालन करणे, दुसर्‍यांचे ऐकणे, ऐकलेले स्वीकारणे आणि त्यानुसार कृती करणे अत्यंत आवश्यक आहे. त्यामुळे आपल्यावर चांगले संस्कार होऊन आपण आपल्या जीवनाचे ध्येय सहजपणे गाठू शकतो. सकाळी स्वतःहून उठणे, आई-वडील आणि देव यांना नमस्कार करणे, स्वतःच शाळेत जाण्याची सिद्धता करणे, स्वयंप्रेरणेने अभ्यास करणे इत्यादी कृती विद्यार्थ्यांनी करणे आवश्यक आहे.

६. मुलांनी रागीटपणा, हट्टीपणा, तसेच भ्रमणभाष अन् दूरचित्रवाणीसंच पहाणे, अव्यवस्थितपणा, आळस इत्यादी स्वभावदोष दूर केले पाहिजेत. नम्रता, समंजसपणा, शिकण्याची वृत्ती, ऐकण्याची वृत्ती, धर्माचरणाची आवड, देवाची आवड, राष्ट्राभिमान, धर्माभिमान इत्यादी गुण जोपासणे आवश्यक आहे. मुलांनी चांगल्या मित्रांची संगत ठेवावी.