चाकण (पुणे) येथील ऐतिहासिक भुईकोट संग्रामदुर्गाला अतिक्रमणाचा विळखा !

चाकण (पुणे) – जिल्ह्यातील चाकण (ता. खेड) येथील भुईकोट संग्रामदुर्गाला ऐतिहासिक महत्त्व आहे. सध्या दुर्गाच्या डागडुजीचे काम चालू असतांना खंदक गाडले गेलेले दिसतात. अनधिकृत बांधकामांमुळे दुर्गाला धोका निर्माण होत आहे. दुर्गाच्या तटबंदीवर, तसेच बुरुजावर झाडे-झुडपे वाढली आहेत. पुरातत्व विभागाने या दुर्गाच्या परिसराची मोजणी करून दुर्गाचे क्षेत्र संरक्षित करावे. अतिक्रमण काढून टाकावे, अशी मागणी स्थानिक नागरिक आणि इतिहासप्रेमी करत आहेत. पुरातत्व विभाग अतिक्रमण काढत नसल्याचा आरोपही होत आहे.

१. या दुर्गावर छत्रपती शिवाजी महाराज आणि राजमाता जिजाऊ यांनी वास्तव्य केले होते.

२. गेल्या काही वर्षांत दुर्गाच्या परिसरात कचरा टाकणे, खंदक बुजवणे, दगडांची तोडफोड करून दगडांची, तसेच पांढर्‍या मातीची चोरी होणे असे प्रकार घडत आहेत.

३. पुरातत्व विभागाने दुर्गाच्या मध्यवर्ती भागांतून जाणारा रस्ता बंद केला आहे. आतील भागातील आणि परिसरातील अतिक्रमण काढण्याची निर्णायक पावले उचलण्याची आवश्यकता आहे.

४. किल्लेदार फिरंगोजी नरसाळा स्मारक प्रतिष्ठानचे अध्यक्ष अधिवक्ता किरण झिंजुरके म्हणाले, ‘‘छत्रपती शिवाजी महाराजांचे वास्तव्य लाभलेल्या या दुर्गाचे जतन आणि संवर्धन झाले पाहिजे. यासाठी सध्या ३० कोटी रुपयांची विकासकामे चालू आहेत.’’