सनातन प्रभात > Post Type > बातम्या > आंतरराष्ट्रीय बातम्या > Ramesh Chandra Sen : बांगलादेशामध्ये अवामी लीगच्या वयोवृद्ध हिंदु नेत्याचा कारागृहात मृत्यू

Ramesh Chandra Sen : बांगलादेशामध्ये अवामी लीगच्या वयोवृद्ध हिंदु नेत्याचा कारागृहात मृत्यू

अवामी लीग पक्षाचे ज्येष्ठ नेते रमेश चंद्र सेन

ढाका (बांगलादेश) – बांगलादेशामध्ये शेख हसीना यांच्या अवामी लीग पक्षाचे ज्येष्ठ नेते रमेश चंद्र सेन यांचा दिनाजपूर जिल्हा कारागृहात मृत्यू झाला. ८३ वर्षांचे रमेश चंद्र सेन हे शेख हसीना यांचे निकटवर्तीय मानले जात होते आणि त्यांच्या सत्तेच्या समाप्तीनंतर ते कारागृहात होते. कारागृह प्रशासनानुसार ७ फेब्रुवारीला सकाळी त्यांची प्रकृती अचानक खालावली. त्यानंतर त्यांना दिनाजपूर वैद्यकीय महाविद्यालय रुग्णालयात नेण्यात आले. तेथे सकाळी साधारण ९.३० वाजता डॉक्टरांनी त्यांना मृत घोषित केले. दिनाजपूर कारागृह अधीक्षक फरहाद सरकार यांनी सांगितले की, सर्व कायदेशीर प्रक्रिया पूर्ण झाल्यानंतर मृतदेह कुटुंबियांकडे सोपवण्यात येईल.

कारागृहात योग्य उपचार मिळाले नसल्यानेच मृत्यू ! – अवामी लीगचा आरोप

अवामी लीगचे केंद्रीय संघटन सचिव शफिउल आलम चौधरी नादेल यांनी आरोप केला की, रमेश चंद्र सेन ५ वेळा संसद सदस्य राहिले असून माजी मंत्रीही होते. आजारी आणि वृद्ध असतांनाही त्यांना साखळ्या घालून अटक करण्यात आली. कारागृहात त्यांना योग्य उपचार मिळाले नाहीत, त्यामुळेच त्यांचा मृत्यू झाला, असा आरोप त्यांनी केला. त्यांनी या मृत्यूविषयी अंतरिम सरकारचे प्रमुख महंमद युनूस यांच्याकडे उत्तर मागितले.
बांगलादेश छात्र लीगचे अध्यक्ष सद्दाम हुसेन यांनीही गंभीर आरोप केले. कोणतेही ठोस आरोप नसतांना त्यांना कारागृहात ठेवण्यात आले. जामीन नाकारण्यात आला. किमान वैद्यकीय सुविधा किंवा मूलभूत मानवी हक्कही देण्यात आले नाहीत. दीड वर्षे खटला न चालवता कारागृहात ठेवल्यामुळे त्यांची प्रकृती सतत ढासळत गेली, असे त्यांनी म्हटले.

वर्ष २०२५ मध्ये पोलीस कोठडीत १०७ जणांचा मृत्यू

मानवी हक्क संघटना ऐन्.ओ. सालिश केंद्राच्या माहितीनुसार बांगलादेशात वर्ष २०२५ मध्ये कोठडीत १०७ जणांचा मृत्यू झाला. यांपैकी बहुतांश अवामी लीगचे नेते आणि कार्यकर्ते होते. बहुतांश प्रकरणांत मृत्यूचे कारण हृदयविकाराचा झटका किंवा अचानक आजार असे नमूद करण्यात आले; मात्र कोणत्याही प्रकरणाची सखोल चौकशी झालेली नाही, असा दावाही करण्यात आला.

नूतन लेख