कामथे (ता. चिपळूण) येथे हिंदु जनजागृती समितीच्या वतीने प्रजासत्ताक दिनानिमित्त क्रांतीगाथा प्रदर्शन  !

क्रांतीगाथा प्रदर्शनातून तरुण पिढीमध्ये देशभक्ती निर्माण होईल ! –  प्रदर्शनार्थींचा अभिप्राय

चिपळूण – देशाला मिळालेले स्वातंत्र्य हे क्रांतीकारकांच्या बलीदानातून मिळालेले आहे. त्यांनी राष्ट्रासाठी केलेला त्याग तरुण पिढीपर्यंत पोचावा. त्यातून देशभक्तीची पिढी सिद्ध व्हावी, या उद्देशाने ‘हिंदु जनजागृती समितीच्या’ वतीने क्रांतीगाथा प्रदर्शन लावण्यात येते. याच उद्देशाने तालुक्यातील कामथे येथील मा. बाळासाहेब माटे माध्यमिक आणि उच्च माध्यमिक विद्यालयाच्या सभागृहात २६ जानेवारी हिंदु जनजागृती समितीच्या वतीने ‘क्रांतीगाथा प्रदर्शन’ लावण्यात आले होते.

हे प्रदर्शन पाहिल्यानंतर अनेक जिज्ञासूंनी अभिप्राय देतांना म्हटले आहे, ‘विद्यार्थी, तसेच युवकांमध्ये जागृती व्हावी, या उद्देशाने हिंदु जनजागृती समिती राष्ट्रधर्माचे कार्य करत आहे. विद्यार्थ्यांना प्रेरणा मिळेल, असे हे क्रांतीकारकांचे प्रदर्शन आहे. क्रांतीगाथा प्रदर्शनातून विद्यार्थी, तसेच तरुण पिढीमध्ये देशभक्ती निश्चित निर्माण होईल.’

आजच्या या प्रदर्शनाला विद्यार्थ्यांच्या समवेत संस्थाचालक, शिक्षक-कर्मचारी वृंद, ग्रामस्थ यांचा चांगला प्रतिसाद लाभला. प्रदर्शन आयोजनात साधक श्री. विनायक कांगणे यांच्यासह संस्थेचे शिक्षक-कर्मचारी वृंदानी चांगले सहकार्य केले.