Justice Swaminathan : माझे निलंबन होऊ नये !

एका कार्यक्रमात ‘कार्तिगई दीपम्’सारखा दीप प्रज्वलित करतांना मद्रास उच्च न्यायालयाचे न्यायमूर्ती स्वामीनाथन् यांचे मिश्किल विधान !

चेन्नई (तमिळनाडू) – येथे २४ जानेवारी या दिवशी ‘धारा डिवाइन अवॉर्ड्स’ कार्यक्रमाचा प्रारंभ मद्रास उच्च न्यायालयाचे न्यायमूर्ती जी.आर्. स्वामीनाथन् यांनी दीप प्रज्वलित करून केला. न्यायमूर्ती स्वामीनाथन् यांनी यापूर्वी राज्यातील तिरुप्परनकुंड्रम् टेकडीवरील दगडी स्तंभावर ‘कार्तिगई दीपम्’ प्रज्वलित करण्यास अनुमती दिली होती. कार्यक्रमात त्यांनी जो दीप लावला होता, तो त्याच पद्धतीचा बनवण्यात आला होता. यावरून न्यायमूर्ती स्वामीनाथन् विनोदाने म्हणाले की, मी योग्य दीप लावत आहे ना ? कि हा सर्वेक्षणासाठीचा दगड आहे ? माझ्या सेवाकाळातील साडेचार वर्षे अजून शेष आहेत आणि त्या कालावधीपूर्वी माझे निलंबन होऊ नये. आजचा कार्यक्रम सनातन धर्म अधिक बळकट होण्याची आशा देतो, असेही त्यांनी नमूद केले.

तिरुप्परनकुंड्रम् मंदिरात दीप प्रज्वलनास दिलेल्या निर्णयामुळे न्यायमूर्ती स्वामीनाथन् यांना राज्यातील सत्ताधारी द्रमुक (द्रविड मुन्नेत्र कळघम् – द्रविड प्रगती संघ) पक्षाकडून टीकेला सामोरे जावे लागले होते.