मुंबईचा महापौर मराठी आणि हिंदूच होणार ! – नितेश राणे, मत्स्य आणि बंदरे विकास मंत्री

मुंबई – मुंबईचा महापौर मराठी आणि हिंदूच होणार, असे सडेतोड विधान मत्स्य आणि बंदरे विकास मंत्री नितेश राणे यांनी केले. मुंबईचा महापौर कोण होणार ?, यावरून सत्ताधारी आणि विरोधक यांच्यात वाद चालू आहेत. या पार्श्वभूमीवर ते बोलत होते.
नितेश राणे पुढे म्हणाले, ‘‘कित्येक दिवसांपासून मुंबईचा महापौर खान, पठाण किंवा अब्दुल होणार; मुंबईचा महापौर कुणीतरी बुरखाधारी महिलासुद्धा होऊ शकते, अशा धमक्या ‘ए.आय.एम्.आय.एम्.’चे (ऑल इंडिया मजलिस(-ए-इत्तेहादुल मुस्लिमीन – अखिल भारतीय मुस्लिम एकता संघा’चे) नेते वारीस पठाण देत आहेत. तेव्हा ठाकरे गटाच्या कुणालाही मिरची झोंबली नाही. कुणीही या विधानावर आक्षेप घेतला नाही; पण भाजपचे वरिष्ठ नेते कृपाशंकर सिंह यांनी ‘मुंबईचा महापौर उत्तर भारतीय होणार’, असे म्हटल्यावर सगळेच बिळातून बाहेर येऊन ओरडू लागले. या लोकांनी हिंदूंमध्ये फूट पाडण्याची सुपारी घेतलेली दिसते; पण कुणी कितीही ओरडले, तरी मुंबईचा महापौर मराठी आणि हिंदूच होणार.