महानगरपालिका निवडणुकीसाठी महाराष्ट्रात होणार बहुरंगी लढत

मुंबई – विधानसभेच्या निवडणुकीप्रमाणे महानगरपालिकांमध्ये महाविकास आघाडी आणि महायुती एकत्र लढत नसून स्थानिक स्थितीनुसार प्रत्येक राजकीय पक्षांनी एकमेकांशी आघाडी आणि युती केल्या आहेत. त्यामुळे महाराष्ट्रातील येऊ घातलेल्या २९ महानगरपालिकांच्या निवडणुका बहुरंगी होणार आहेत.

राज्यातील महत्त्वाच्या मानल्या जाणार्‍या मुंबई महानगरपालिकेच्या निवडणुकीत भाजप आणि शिवसेना यांच्यात युती झाली आहे. मुंबईसह ठाणे आणि कल्याण महानगरपालिकेतही भाजप-शिवसेना युती झाली आहे. यांव्यतिरिक्त पुणे, छत्रपती संभाजीनगर, नाशिक, पिंपरी-चिंचवड, नागपूर, अकोला, मालेगाव आदी महानगरपालिकांमध्ये मात्र शिवसेना आणि भाजप एकमेकांच्या विरोधात लढणार आहेत. महायुतीमधील राष्ट्रवादी काँग्रेसनेही सर्व ठिकाणी स्वतंत्रपणे उमेदवार उभे केले आहेत. महाविकास आघाडीमध्ये काँग्रेस, राष्ट्रवादी काँग्रेस शरदचंद्र पवार आणि उद्धव बाळासाहेब ठाकरे या पक्षांनीही स्वत:चे स्वतंत्रपणे उमेदवार उभे केले आहेत.