संकटकाळात राज्यशासन पूरग्रस्तांना सर्वतोपरी साहाय्य करणार ! – मुख्यमंत्री देवेंद्र फडणवीस

मुख्यमंत्री आणि उपमुख्यमंत्री यांनी केली पूरग्रस्त भागाची पहाणी

सोलापूर, २४ सप्टेंबर (वार्ता.) – जिल्ह्यात अतीवृष्टी आणि पूर यांमुळे पिके, जनावरे, घरे, व्यावसायिक यांची हानी झाली. पूरग्रस्तांनी धीर धरावा, राज्यशासन त्यांच्या पाठीशी असून त्यांना सर्वतोपरी साहाय्य केले जाणार असल्याचे आश्वासन मुख्यमंत्री देवेंद्र फडणवीस यांनी दिले.

मुख्यमंत्र्यांनी सोलापूर जिल्ह्याच्या माढा तालुक्यातील निमगाव, तसेच दारफळ सीना या गावांना भेटी देऊन पूरग्रस्त भागांची पहाणी केली. ते म्हणाले, ‘‘मंत्रीमंडळाच्या बैठकीत पूरग्रस्तांना तातडीचे साहाय्य म्हणून २ सहस्र कोटी रुपयांचा निधी संमत करण्यात आला आहे. यापुढेही पूरग्रस्तांना साहाय्य देण्यासाठी शासन हात आखडता घेणार नाही.’’

दारफळ गावात पुरामुळे मोठ्या प्रमाणात पाणी आल्याने नदीने पात्र पालटले आणि गावाचा मोठा भाग पाण्यात गेला, तसेच घरात पाणी शिरले. ‘शासन शेती, घरे, अन्नधान्य आदींसाठी साहाय्य करणार असून रस्ते, शाळा, शेतरस्ते, वीजव्यवस्था आदी सुविधांसाठीही साहाय्य करील. व्यावसायिकांनाही स्वतंत्र साहाय्य करण्यात येईल’, असे मुख्यमंत्री म्हणाले.