सनातन प्रभात > Post Type > बातम्या > राष्ट्रीय बातम्या > Kashi Online Pind Daan : काशीमध्ये ऑनलाईन होत आहेत पिंडदान विधी !

Kashi Online Pind Daan : काशीमध्ये ऑनलाईन होत आहेत पिंडदान विधी !

वाराणसी (उत्तरप्रदेश)  – सध्या श्राद्ध पक्ष चालू आहे. अनेकांना काशी किंवा गया येथे जाऊन श्राद्ध करण्याची इच्छा असते; मात्र ते शक्य होत नाही. अशांसाठी काशी येथील पुरोहितांना ऑनलाईन श्राद्ध करून देण्याची सुविधा उपलब्ध करून दिली आहे. याचा लाभ विदेशातील हिंदूही घेत आहेत. येथे कॅमेरा जोडलेला असतो आणि पुरोहित संबंधित व्यक्तींसाठी श्राद्ध करून त्यांचे थेट प्रक्षेपण करतात. काही पुरोहित त्यांच्या भ्रमणभाष संचावर व्हिडिओ बनवून ते संबंधितांना पाठवत आहेत. या ऑनलाईन विधीसाठी ॲपद्वारे आरक्षण केले जाते आणि क्यूआर कोडद्वारे पैसे पाठवले जातात.

या संदर्भात आचार्य मोहित उपाध्याय यांना विचारले असता ते म्हणाले की, पूजा करवून घेणारे विदेशात बसून थेट विधी पहात आहेत. ऑस्ट्रेलिया, यु.के किंवा अमेरिका येथे अनेक भारतीय वंशाचे लोक आहेत. ते तिथे स्थायिक झाले आहेत; परंतु त्यांना काशीमध्ये त्यांच्या पूर्वजांसाठी पिंडदान करायचे आहे. त्यांना येथे येण्यास अडचणी येतात. अनेक लोक प्रकृती अस्वास्थ्यामुळे येऊ शकत नाहीत. म्हणून ते आमच्याशी संपर्क साधतात. आम्ही ज्यांच्यासाठी पिंडदान करायचा आहे, त्यांचे गोत्र, वंश आणि नाव आणि पत्ता विचारतो. भ्रमणभाषवरच संकल्प केला जातो, त्यानंतर पूजा चालू होते. आम्ही एकाच वेळी ५-६ लोकांसाठी पूजा करू शकतो.

पंडित योगी आलोक म्हणाले की, परदेशातून लोक नेहमीच काशीला येत आहेत; परंतु आता गर्दी वाढू लागल्याने परदेशातून येणार्‍या भाविकांना अडचणी येत आहेत. त्यामुळे लोक पिंडदान ऑनलाईन करून घेऊ लागले आहेत.

नूतन लेख