हासन (कर्नाटक) येथे श्री गणेशमूर्ती विसर्जन मिरवणुकीत ट्रक घुसला, ८ जणांचा मृत्यू

हासन (कर्नाटक) – येथील मोसलेहोसाहल्ली गावात १३ सप्टेंबर या दिवशी श्री गणेशमूर्तींचे विसर्जनासाठी काढलेल्या मिरवणुकीत एक भरधाव ट्रक घुसला. या अपघातात ८ जणांचा जागीच मृत्यू झाला, तर अनुमाने २२ जण घायाळ झाले. हासनच्या उपायुक्त के.एस्. लता कुमारी यांनी सांगितले की, घायाळ झालेल्यांना उपचारांसाठी के.आय.एम्.एस्. रुग्णालयात भरती करण्यात आले आहे, तर ७ जणांवर खासगी रुग्णालयात उपचार चालू आहेत. त्यांची प्रकृती स्थिर असल्याचे सांगितले जात आहे. त्यांनी सांगितले की, अपघातामागचे कारण शोधले जात आहे. प्रत्यक्षदर्शींच्या मते, भरधाव वेगाने जाणारा ट्रक दुभाजकाला धडकला आणि नंतर मिरवणुकीत घुसला.

मुख्यमंत्र्यांकडून मृतांच्या कुटुंबियांना ५ लाख रुपयांची भरपाई

कर्नाटकचे मुख्यमंत्री सिद्धरामय्या यांनी या घटनेविषयी तीव्र दुःख व्यक्त केले असून मृतांच्या कुटुंबियांना ५ लाख रुपयांची भरपाई  देण्याची घोषणा केली आहे. घायाळ झालेल्यांच्या उपचाराचा संपूर्ण खर्च सरकार उचणार असल्याचेही त्यांनी स्पष्ट केले. माजी मुख्यमंत्री एच्.डी. कुमारस्वामी, तसेच हासनचे खासदार श्रेयस पटेल यांनीही या घटनेविषयी दुःख व्यक्त केले आहे.