सनातन प्रभात > Post Type > बातम्या > राष्ट्रीय बातम्या > DK Shivakumar : कर्नाटकातील काँग्रेस सरकारमधील उपमुख्यमंत्र्यांनी विधानसभेत गायले रा.स्व. संघाचे गीत  

DK Shivakumar : कर्नाटकातील काँग्रेस सरकारमधील उपमुख्यमंत्र्यांनी विधानसभेत गायले रा.स्व. संघाचे गीत  

संघाशी मतभेद असून त्याचा इतिहास जाणून घेत असल्याचे मत

डी.के. शिवकुमार

बेंगळुरू (कर्नाटक) – कर्नाटक सरकारमधील उपमुख्यमंत्री आणि काँग्रेसचे प्रदेशाध्यक्ष डी.के. शिवकुमार यांनी २१ ऑगस्ट या दिवशी विधानसभेत राष्ट्रीय स्वयंसेवक संघाचे गीत ‘नमस्ते सदा वत्सले मातृभूमे’ गाऊन सर्वांना आश्चर्यचकीत केले. भाजपच्या आमदारांनी शिवकुमार यांच्यावर मे मासात बेंगळुरू येथील चिन्नास्वामी स्टेडियमबाहेर झालेल्या चेंगराचेंगरीवरून आरोप केला होता. त्यावर उत्तर देतांना शिवकुमार बोलत होते.

रा.स्व. संघ मुलांना शिकवण्याचा प्रयत्न करतो !

उपमुख्यमंत्री शिवकुमार पुढे म्हणाले की, मी जन्मजात काँग्रेसचा आहे आणि ते माझ्या रक्तातच आहे; पण मी सर्व राजकीय पक्षांचा अभ्यास केला आहे. मला ठाऊक आहे की, कर्नाटकमध्ये राष्ट्रीय स्वयंसेवक संघ संस्था कशा उभारतो आहे ? एक नेता म्हणून मी अभ्यास केला आहे. तो प्रत्येक जिल्हा आणि तालुका येथील शाळा नियंत्रणात घेत आहे आणि त्यात मोठ्या प्रमाणावर पैसा गुंतवत आहे. संघवाले मुलांना शिकवण्याचा प्रयत्न करत आहेत.

एक नेता म्हणून मला हे ठाऊक असले पाहिजे की, माझे प्रतिस्पर्धी कोण आहेत आणि माझे मित्र कोण आहेत ? म्हणून मी केवळ संघाबद्दल, संघाच्या इतिहासाबद्दल जाणून घेण्याचा प्रयत्न केला. राजकीयदृष्ट्या आमच्यात पुष्कळ मतभेद आहेत, ते वेगळे प्रकरण आहे. ‘मी काँग्रेसचा आहे आणि काँग्रेसचे नेतृत्व करीन’, असे त्यांनी पुढे सांगितले.

नूतन लेख