UP Free Bus : उत्तरप्रदेशात रक्षाबंधनानिमित्त महिलांसाठी निःशुल्क बससेवा !

उत्तरप्रदेशातील योगी सरकारचा अभिनंदनीय निर्णय

लक्ष्मणपुरी – ८ ते १० ऑगस्ट २०२५ या कालावधीत उत्तरप्रदेशातील महिलांना रक्षाबंधनानिमित्त राज्य परिवहन महामंडळ आणि शहरी बस सेवा यांमध्ये निःशुल्क प्रवासाची सुविधा मिळणार आहे. मुख्यमंत्री योगी आदित्यनाथ यांनी ही घोषणा केली आहे. रक्षाबंधनाच्या निमित्ताने महिलांना त्यांच्या भावांकडे सहजतेने जाता यावे, यासाठी हा निर्णय घेण्यात आला आहे. महिलांना ३ दिवस निःशुल्क प्रवास करता येणार असल्यामुळे राज्यातील अनेक कुटुंबांमध्ये सणाच्या उत्साहात भर पडणार आहे.

१. ही सुविधा संपूर्ण उत्तरप्रदेशात लागू राहील. ८ ऑगस्ट या दिवशी सकाळी १० वाजल्यापासून ते १० ऑगस्टच्या रात्री १२ वाजेपर्यंत महिलांना या निःशुल्क प्रवासाचा लाभ घेता येईल. या काळात कोणतीही तिकीट न काढता महिला बससेवा वापरू शकतात.

२. मुख्यमंत्र्यांनी अधिकार्‍यांना निर्देश दिले आहेत की, या काळात पुरेशा बससेवा उपलब्ध करून द्याव्यात. लक्ष्मणपुरी, कानपूर, गोरखपूर अशा मोठ्या शहरांमध्ये विशेष नियोजन करण्याचे आदेश देण्यात आले आहेत.