सांगली जिल्हा मध्यवर्ती बँकेच्या बाज शाखेत ५० लाख रुपयांचा अपहार !

सांगली – सांगली जिल्हा मध्यवर्ती बँकेच्या बाज (तालुका जत) शाखेत शाखाधिकारी आणि शिपाई यांच्याकडून शासकीय निधीतील अनुमाने ५० लाख रुपयांचा अपहार केल्याचा धक्कादायक प्रकार उघडकीस आला आहे. या प्रकरणाची गंभीर नोंद घेऊन या शाखेतील कर्मचार्‍यांची बँकेच्या वरिष्ठ अधिकार्‍यांकडून चौकशी चालू करण्यात आली आहे. चौकशीअंती अपहाराचा आकडा आणखी वाढण्याची शक्यता वर्तवली जात आहे.

बाज येथील शासनाकडून शेतकर्‍यांसाठी आलेल्या अनुदानीत अनुमाने ५० लाख रुपये तत्कालीन शाखाधिकार्‍यांनी बँकेच्या खात्यावरून स्वतः आणि इतर नातेवाइकांच्या नावावर रकमेचा अपहार केल्याचा प्रकार बँकेच्या पडताळणीत निदर्शनास आला आहे. हा प्रकार उघडकीस आल्यानंतर बँकेच्या मुख्यालयातील वरिष्ठ अधिकार्‍यांचे पथक जत तालुक्यात तळ ठोकून आहे. त्यांनी बाज शाखेतील व्यवहारांची दिवसभर पडताळणी केली. अपहाराच्या प्रकरणातील नियुक्तीस असलेल्या डफळापूर शाखेचीही पडताळणी केली जाणार आहे. यामध्ये अपहाराचा आकडा आणखी वाढण्याची शक्यता आहे.