पाकिस्तानला नामोहरम केल्याविषयी छत्रपती संभाजीनगर येथे क्रांतीचौकात जल्लोष !

देशभक्तीपर गीतांमुळे परिसर देशभक्तीमय

छत्रपती संभाजीनगर – पहलगाम येथे २२ एप्रिल या दिवशी अतिरेकी आक्रमण करण्यात आले होते. याचे चोख प्रत्युत्तर देत भारतीय सैनिकांनी जिवाची बाजी लावून पाकिस्तानातील आतंकवादी तळ उद्ध्वस्त केले. पाकड्यांची सुरक्षाव्यवस्था उद्ध्वस्त करण्यात आली. भारतीय सैनिकांनी पाकिस्तानने केलेले आक्रमण परतवून लावले. पाकिस्तानला नामोहरम केल्याविषयी क्रांती चौक येथे १२ मे या दिवशी राज्याचे सामाजिक न्यायमंत्री तथा छत्रपती संभाजीनगरचे पालकमंत्री संजय शिरसाट यांच्या पुढाकाराने क्रांती चौक येथे कृतज्ञता कार्यक्रम घेण्यात आला. या वेळी देशसेवेमध्ये हुतात्मा झालेल्या सैनिकांना श्रद्धांजली अर्पण करण्यात आली.

या वेळी सर्व जाती-पाती, धर्म, राजकीय पक्ष बाजूला ठेवून भारतीय सैनिकांच्या प्रति सर्वजण ऋण व्यक्त करण्यासाठी एकत्र आले होते. देशभक्तीपर गीतांमुळे परिसर देशभक्तीमय झाला होता. या वेळी तरुण युवक युवती, माता भगिनी, नागरिक हातात तिरंगा घेऊन मोठ्या संख्येने उपस्थित होते. ‘भारतमाता की जय, वन्दे मातरम्’ या घोषणांनी परिसर दणाणून गेला होता.