‘महाराष्ट्र मंदिर न्यास परिषदे’विरुद्ध खोट्या तक्रारी करून अपकीर्ती करणार्‍या ‘सिटीझन फॉर जस्टीस अँड पीस’वर कारवाई करा ! – महाराष्ट्र मंदिर महासंघाची मागणी

पेठवडगाव (जिल्हा कोल्हापूर) – मंदिरांच्या समस्या सोडवण्यासाठी आणि मंदिरांचे सुव्यवस्थापन करण्याच्या उद्देशाने २४ आणि २५ डिसेंबर २०२४ या दिवशी शिर्डी येथे तृतीय ‘महाराष्ट्र मंदिर न्यास परिषद’ आयोजित केली होती; मात्र तिस्ता सेटलवाड आणि फादर सेर्डिक यांच्या ‘सिटीझन फॉर जस्टीस अँड पीस’ (सीजेपी) या संघटनेने परिषदेविरुद्ध खोट्या तक्रारी करून सामाजिक तेढ निर्माण करण्याचा प्रयत्न केला. खोट्या तक्रारी करून अपकीर्ती करणार्‍या ‘सिटीझन फॉर जस्टीस अँड पीस’वर कारवाई करा, या मागणीची तक्रार मंदिर महासंघाच्या वतीने श्री गुरुदत्त स्वामी समर्थ मंदिराचे श्री. मनोहर काटकर यांच्या पुढाकाराने पेठवडगाव पोलीस ठाण्यात करण्यात आली.

ही तक्रार पोलीस उपनिरीक्षक सलगर यांनी स्वीकारली. या प्रसंगी मारुति मंदिराचे पुजारी श्री. विजय गुरव, श्रीराम मंदिराचे पुजारी श्री. अनिल सोळशे, हिंदु जनजागृती समितीचे श्री. संतोष सणगर, श्री. प्रीतम पवार, सर्वश्री राजेंद्र जाधव, युवराज वाळवेकर, अमोल गोंजारी, रोहित माने, सिद्धार्थ कुंभार उपस्थित होते.