लोहगडावर त्रिपुरारी पौर्णिमेनिमित्त दीपोत्सव साजरा !

वडगाव मावळ (जिल्हा पुणे) – ‘श्री शिवाजी रायगड स्मारक मंडळ’ संचालित लोहगड विसापूर विकास मंच, लोहगड, घेरेवाडी आणि पंचक्रोशीतील ग्रामस्थांच्या वतीने त्रिपुरारी पौर्णिमेनिमित्त लोहगड येथील शिवस्मारकावर दीपोत्सव साजरा करण्यात आला. लोहगड येथे आयोजित कार्यक्रमात टाटा उद्योग समूहाचे माजी प्रमुख स्वर्गीय रतन टाटा आणि शिवप्रेमी स्वर्गीय शेखर इनामदार यांना दीपवंदनेने श्रद्धांजली अर्पण करून नंतर दीपोत्सव साजरा करण्यात आला. शिवस्मारकावर सहस्र दिव्यांनी परिसर उजळून निघाला होता, तसेच सुंदर फुलांनी सजावट करण्यात आली होती. छत्रपती शिवरायांच्या जयघोषाने नवचैतन्य निर्माण झाले होते. सुंदर रांगोळी साकारण्यात आली होती. शिवस्मारक परिसर विकासाचे रखडलेले काम पूर्ण करण्यासाठी शासन दरबारी पाठपुरावा करण्याचा मनोदय संस्थापक सचिन टेकवडे यांनी व्यक्त केला.

या वेळी सरपंच सोनाली बैकर, उपसरपंच पंढरीनाथ विखार, सोमनाथ बैकर, गणेश धानिवले आदी उपस्थित होते. ‘पिंपरी-चिंचवड ऑटोमोटिव्ह सर्व्हिस सोसायटी’ आणि ‘छावा ग्रुप मळवली’ यांनी दीपोत्सवात सहभाग घेतला.