पुणे येथील बोपदेव घाट परिसरात फिरायला गेलेल्या तरुणीवर ३ जणांनी केला सामूहिक बलात्कार

पुणे – कोंढव्यातील बोपदेव घाट परिसरात एका २१ वर्षीय तरुणीवर तिघांनी सामूहिक बलात्कार केल्याची घटना घडली आहे. ही घटना ३ ऑक्टोबरला रात्री घडली असल्याची प्राथमिक माहिती मिळत आहे. त्यांनतर गुन्हे शाखा आणि स्थानिक पोलिसांची पथके आरोपींच्या मागावर रवाना करण्यात आली आहेत. (गेल्या काही दिवसांपासून पुण्यात सातत्याने घडणार्‍या लैंगिक अत्याचारांच्या घटनांमुळे नागरिकांमध्ये भीतीचे वातावरण निर्माण झाले आहे. यातून पोलिसांची निष्क्रीयताच अधोरेखित होते ! – संपादक)

पुण्याचे सहपोलीस आयुक्त रंजन कुमार शर्मा यांनी सांगितले की, पीडित मुलगी तिच्या मित्रासमवेत बोपदेव घाटात गेली होती. रात्री ११ वाजता त्या ठिकाणी ३ अनोळखी मुले आली. त्यांनी पीडितेसमवत असलेल्या मुलाला मारहाण केली. तरुणीवर अत्याचार केले. या घटनेची माहिती पोलिसांना ४ ऑक्टोबरला पहाटे ५ वाजता मिळाली. यासाठी एकूण १० पथके रवाना करण्यात आली आहेत. या घटनेतील ३ मुलांचा शोध चालू आहे. या घटनेतील पीडित तरुणी गंभीर घायाळ असून तिच्यावर रुग्णालयात उपचार चालू आहेत.