खासदार उदयनराजे भोसले यांच्या विजयी मिरवणुकीत अज्ञातांकडून सोन्याच्या दागिन्यांची चोरी !

सातारा, ७ जून (वार्ता.) – भाजपचे खासदार श्रीमंत छत्रपती उदयनराजे भोसले हे नुकत्याच झालेल्या लोकसभा निवडणुकीमध्ये विजयी झाले. या निमित्ताने शहरांमध्ये त्यांची विजयी मिरवणूक काढण्यात आली. या मिरवणुकीमध्ये अज्ञात चोरांनी ८ तोळे सोन्याचे दागिने चोरले असल्याच्या तक्रारी शहर पोलीस ठाण्यात नोंद करण्यात आल्या आहेत. या मिरवणुकीमध्ये ५ सहस्रांहून अधिक समर्थक सहभागी झाले होते. यासारख्या अजूनही दोन-चार घटना घडल्याचे पोलीस सूत्रांचे म्हणणे आहे. या घटनांची स्वतःहून नोंद घेत सातारा शहर गुन्हे प्रकटीकरण शाखेने अन्वेषण चालू केले आहे.