हर्सूल परिसरातील ३ तरुण बाँबस्फोटातील २ मुख्य संशयित आरोपींच्या संपर्कात !

बेंगळुरू बाँबस्फोटाचे धागेदोरे छत्रपती संभाजीनगरपर्यंत !

छत्रपती संभाजीनगर – काही दिवसांपूर्वी बेंगळुरूतील रामेश्वरम् कॅफेमध्ये बाँबस्फोट झाला होता. या बाँबस्फोटातील संशयित आरोपींच्या संपर्कात छत्रपती संभाजीनगरमधील हर्सूल परिसरातील ३ तरुण असल्याची माहिती समोर आली आहे. राष्ट्रीय अन्वेषण यंत्रणेकडून (‘एन्.आय.ए.’कडून) या तिघांची ८ घंटे चौकशी करण्यात आली आहे. बेंगळुरू बाँबस्फोट प्रकरणातील फरार संशयित आतंकवादी अब्दुल मतीन ताहा आणि मुसव्वीर हुसेन शाजीब यांच्यासमवेत आभासी चलनाद्वारे (‘क्रिप्टोकरन्सी’द्वारे) व्यवहार केल्याचा ठपका या तिघांवर ठेवण्यात आला आहे. ज्यांची चौकशी करण्यात आली, त्या तिघांनीही शिक्षण अर्धवट सोडले आहे. तरीही ते लाखो रुपयांची कमाई करत असल्याने २ वर्षांपासून त्यांच्यावर अन्वेषण यंत्रणा पाळत ठेवून आहेत.

बेंगळुरूतील स्फोटासाठी ‘आयडी टायमर’चा वापर करण्यात आला होता. या शक्तीशाली बाँबस्फोटात ११ जण गंभीररित्या घायाळ झाले होते. या प्रकरणात एन्.आय.ए. आणि देहली पोलिसांचे पथक यांनी हर्सूल परिसरातील ३ तरुणांची कसून चौकशी केली. त्यात त्यांच्या घराची झाडाझडती घेऊन ‘लॅपटॉप’, भ्रमणभाष यांसह ते वापरत असलेले अन्य ‘इलेक्ट्रॉनिक साहित्य’ जप्त करण्यात आले आहे. त्यात संशयित आतंकवाद्यांना ओळखत नसल्याचे त्या तरुणांनी सांगितले.