कर्णावती येथील गरबा मंडपात हिंदु वेशभूषा करून घुसला मुसलमान तरुण !

बजरंग दलाच्या कार्यकर्त्यांनी हाकलले !

कर्णावती (गुजरात) – येथील वाय.एम्.सी.ए. क्लबमधील गरबा मंडपात घुसलेल्या मुसलमान तरुणाला हिंदुत्वनिष्ठ संघटनांनी पकडून बाहेर काढले. या घटनेचा व्हिडिओ सामाजिक माध्यमांतून प्रसारित होत आहे.

हा मुसलमान तरुण हिंदूंप्रमाणे वेशभूषा करून येथे घुसला होता. येथे उपस्थित बजरंग दलाच्या कार्यकर्त्यांना त्याचा संशय आला आणि त्याला थांबवून त्याची चौकशी चालू केली. या वेळी त्याचे आधारकार्ड पडताळण्यात आले. त्यात तो मुसलमान असल्याचे आढळून आले. ‘तुम्ही हिंदूंच्या देवतांवर विश्‍वास ठेवत नाही, तर तू येथे का आला आहेस ? हे डिस्कोचे स्थान नाही. येथे पुन्हा येऊ नको’, असे सांगत त्याला मंडपातून बाहेर काढले.

उज्जैन येथे अहिंदूंना प्रवेशबंदी

मध्यप्रदेशातील उज्जैन येथील गरबा मंडपांमध्ये अहिंदूंना येण्यास बंदी घालण्यात आली आहे. तसेच आधारकार्ड  नसल्यास मंडपात प्रवेश देण्यात येणार नाही, असा नियम करण्यात आला आहे. येथील संकल्प संस्कृती संस्थेने तिच्या मंडपामध्ये प्रवेश करतांना टिळा लावण्याचा नियम केला आहे. या संस्थेचे अध्यक्ष बहादुर सिंह राठौर यांनी म्हटले की, आम्ही कोणत्याही धर्माच्या विरोधात नाही; मात्र ज्यांना यायचे आहे, त्यांनी त्यांच्या कुटुंबातील महिलांसमवेत यावे. येथे आधारकार्ड पडताळण्यात येत आहे. त्याविषयी पोलीस अधीक्षक सचिन शर्मा यांनी म्हटले की, हा आयोजकांचा निर्णय आहे.