भावपूर्ण वातावरणात कृष्णावेणीमातेच्या उत्सवास नृसिंहवाडी (जिल्हा कोल्हापूर) येथे प्रारंभ !

नृसिंहवाडी (जिल्हा कोल्हापूर), ८ फेब्रुवारी (वार्ता.) – प.प. (परमहंस परिव्राजकाचार्य) वासुदेवानंद सरस्वती टेंबेस्वामी महाराज यांनी १२५ वर्षांपूर्वी चालू केलेल्या कृष्णावेणीमातेचा उत्सव भावपूर्ण वातावरणात ७ फेब्रुवारी या दिवशी प्रारंभ झाला. हा उत्सव १० दिवस चालणार आहे. ७ फेब्रुवारी या दिवशी पहाटे ५ वाजता मूर्तीचे आसन आणि किरीट सवाद्य मिरवणुकीने मानकरी जनार्दन कागलकर यांच्या घरामध्ये आणले. तेथे मूर्तीची पूजा करून सकाळी ६ वाजता मिरवणुकीने मूर्ती मुख्य मंदिरात नेण्यात आली.

मिरवणूक मार्गावर संस्कार भारतीच्या वतीने आकर्षक रांगोळ्या रेखाटण्यात आल्या होत्या, तसेच सुवासिनींनी औक्षण केले. मुख्य मंदिरात मूर्ती आणल्यानंतर टेंबेस्वामी महाराजांच्या मठाजवळ उपस्थितांनी ‘घोराष्टकस्तोत्र’ म्हटले. यानंतर मूर्ती मंदिराच्या उत्तरेकडे उभ्या केलेल्या भव्य मंडपात नेण्यात आली. येथे मूर्तीची षोडशोपचार पूजा करून प्राणप्रतिष्ठापना करण्यात आली. उत्सवकाळात १० दिवस भजन-कीर्तन-प्रवचन, असे कार्यक्रम होणार आहेत.