शासकीय सेवेतून बडतर्फ केल्याने आधुनिक वैद्य नीरज कदम यांची कारागृहात रवानगी !

वर्धा येथील अवैध गर्भपाताचे प्रकरण

वर्धा – जिल्ह्यातील आर्वी येथील गर्भपात प्रकरणातील मुख्य आरोपी आधुनिक वैद्या रेखा कदम यांचे पती आधुनिक वैद्य नीरज कदम यांना शासकीय सेवेतून बडतर्फ करण्यात आले असून त्यांची कारागृहात रवानगी करण्यात आली आहे. जिल्हा परिषदेचे मुख्य कार्यकारी अधिकारी डॉ. सचिन ओंबासे यांनी त्यांना सेवेतून बडतर्फ करण्याचे आदेश दिले आहेत. भ्रूणहत्या, शासकीय रुग्णालयातील औषध पुरवठा आणि वन्य प्राण्याची कातडी आढळून येणे या प्रकरणी पोलीस आणि वन विभाग यांच्या वतीने त्यांच्यावर गुन्हे नोंद करण्यात आले आहेत. अवैध गर्भपात प्रकरणाची सखोल चौकशी करण्यासाठी आरोग्य विभागाच्या अतिरिक्त संचालिका डॉ. अर्चना पाटील यांनी ६ सदस्यीय समिती गठीत केली आहे.