वडखळ (जिल्हा रायगड) येथील पोलिसाचा ६ वर्षांपासून विवाहितेवर अत्याचार !

वडखळ (जिल्हा रायगड) – पोलीस असल्याचा अपलाभ घेत पेण येथील एका विवाहितेला तिच्या पतीला आणि मुलांना जिवे मारण्याची धमकी देऊन वर्ष २०१५ पासून बळजोरीने शारीरिक संबंध ठेवणारा पोलीस हवालदार श्याम जाधव याच्याविरोधात पेण पोलीस ठाण्यात बलात्काराचा गुन्हा नोंद करण्यात आला आहे. जाधव याच्याविरोधात ही महिला पोलीस ठाण्यात तक्रार देण्यासाठी गेली असता आरोपीने पेण पोलीस ठाण्यात जाऊन गोंधळ घातला. सेवेत असलेल्या महिला पोलीस नाईक आणि महिला पोलीस उपनिरीक्षक यांना शिवीगाळ केली, तसेच समजावण्यासाठी गेलेल्या पोलिसांनाही मारहाण केली. जाधव याला अटक केली असून ४ जानेवारीपर्यंत पोलीस कोठडी सुनावण्यात आली आहे. (पोलीसच असे वागत असतील, तर ते कायद्याचे रक्षण कसे करणार ? अशा पोलिसांना कठोर शिक्षाच होणे आवश्यक आहे. – संपादक)

जाधव याला तपासणीसाठी उपजिल्हा रुग्णालयात नेत असतांना त्याने पोलिसांना धक्काबुक्की केली. या प्रकरणीही आरोपी श्याम जाधव याच्या विरोधात पेण पोलीस ठाण्यात सरकारी कामात अडथळा आणल्याप्रकरणी गुन्हा नोंद करण्यात आला आहे.